И.В.Савицкий атындағы Қарақалпақстан мәмлекетлик көркем өнер музейи - республикадағы белгили музейлерден бири. Ол Нөкис қаласында 1966-жылда шөлкемлестирилген. 1984-жылдан Н.В.Савицкий аты менен аталады. Музейге И.Савицкийдиң талпыныўы, ҳәрекети ҳәм ол жыйнаған қарақалпақ халқының әмелий көркем өнер дөретпелери негизинде тийкар салынған. Музейдиң улыўма майданы 6, 9 мың м². Музей халықтың әмелий көркем өнери, әййемги ҳәм орта әсирлердеги Хорезмниң көркем өнери, 1920-1930-жыллары өзбек ҳәм рус сүўретлеў өнери, қарақалпақ заманагөй рең-сүўрети ҳәм мүсиншилиги, илимий-ағартыўшылық бөлимлер, китапхана (10 мың дана дөретпе), фонд ҳәм оңлаў устаханасына ийе. Фондта 85 мыңнан аслам экспонат бар (2004).Музей фондында 1920-1930-жылларда авангард сүўретшилер жаратқан дөретпелер жыйналған. Қарақалпақ халық усталары тәрепинен жаратылған зергерлик, ағаш нағыс ойыўшылығы, кестешилик, тоқымашылық (әсиресе, отаў үскенелери) ҳәм басқа дөретпелер әмелий көркем өнер бөлиминде жәмленген.
Әййемги Хорезмниң көркем өнер бөлими музейдиң археологиялық топарлары тәрепинен қолға киргизилген табылмалар есабына және де байымақта. Сүўретлеў өнери бөлими комплекси, әсиресе, ҳәр тәреплеме: комплексти қарақалпақ сүўретшилери (И.Савицкий, К.Саипов, Ж.Қуттимурадов, Д.Төрениязов ҳәм т.б.), Орта Азия сүўретшилигиниң кексе әўлады А.Волков, М.Қурзин, А.Николаев (Усто Мўмин), Н.Карахан, О.Тансиқбоев ҳәм басқалардың үлкен әҳмийетке ийе дөретпелери қурайды. Сондай-ақ, 1920-1930-жылларда белсенди дөретиўшилик еткен рус сүўретшилери А.Шевченко, Р.Фалк, В.Мухина, И.Грабар дөретпелери менен бир қатарда дөретиўшилиги дерлик үйренилмеген. Р.Мазел, К.Редко, А.Сафронов ҳәм басқалардың дөретпелери де қойылған.
Музей экспонатлары монография тәртибинде жыйналғаны менен де қымбатлы болып табылады. Тағы музейдиң айырмашылығы экспонатлардың тығыз жайласыўы, экспозицияларда комплекстиң толық көргизбесине ерискенинде болып есапланады. Музей көркем өнер дөретпелерин жыйнаў, үгитлеў, каталогларды баспадан шығарыў, көргизбелер шөлкемлестириў менен шуғылланады. Музей қасында гилемшилик устаханасы ислеп турыпты; «Нөкис музейиниң дослары» клубы өз жумысын алып бармақта, сондай-ақ, ол көргизбелер шөлкемлестиреди. Музей Халықаралық музейлер комитети (ИКОМ) ағзасы.
Музей 1968-1969-жылларда Москвадағы Шығыс музейинде Қарақалпақ комплексин дәслепки рет көрсетти. 1970-жылдан республика ҳәм шет ел мәмлекетлер (АҚШ, Франция, Германия, Италия, Япония, Россия ҳәм т.б.) деги көргизбелерде қатнасады.
Meros.uz
Аўдарма: Makan.uz
